Ресейде Навальный жақтастарының кезекті наразылық шеруі өтуде

31 қаңтар күні Ресейде Алексей Навальныйды босатуды талап еткен кезекті наразылық акциялары өтуде. Оны таңертең бірінші болып Қиыр Шығыстағы Владивосток пен Хабаровск қалалары тұрғындары бастады.

«ОВД-Инфо» басылымы Владивосток қаласында 30-ға жуық адам ұсталғанын хабарлады. Ал Благовещенск қаласында Азаттық радиосы орыс қызметінің журналисі Андрей Афанасьев акция орнына жетпей жатып ұсталған.

Мәскеуде келісілмеген акцияға қатысушыларды тұтқындау жалғасуда, РИА Новости тілшілерінің есептері бойынша олардың саны кем дегенде 66 адамға жетті.

Билік өкілдерінің айтуынша, заңсыз акцияға 300 адам қатысқан. Атап айтқанда, 200 адам «Сухаревская» алаңында және 100 адам «Красные Ворота» метро станциясында. Әзірге белгілісі, «Чистые Пруды» - 12, «Трубная алаңында» - 19, «Сухаревская» ауданында - 35  шеруілші ұсталды.

Навальныйдың жақтастары арасында саясаткердің ұжымында жұмыс істейтіндер, тәуелсіз баспасөз құралдары және кәсіпкерлер де бар. Навальный командасы бұл жолы нарызылық акцияларын 11 сағаттық белдеуде орналасқан 142 қалада өткізуді жоспарлаған. Ең ірісі Мәскеуде.

Ресей астанасындағы наразылық екі жерге белгіленген. Бірі Федералдық қауіпсіздік қызметінің (ФСБ) орталық ғимараты алдындағы Лубянка скверінде, екіншісі президент әкімшілігі кеңселері орналасқан Ескі алаңда. Наразылық туралы ести сала Мәскеу полициясы қала орталығының мен онда апаратын метро станцияларының жабылатынын мәлімдеген. Сонымен қатар олар акцияның заңсыз екендігін ескертіп, құқық бұзбауға шақырды.