Ресейде Мәсімовтің туысына іздеу салынды

Ресейдің Ішкі істер министрлігі Мэдер Кәпеновке іздеу салды. Ол Қазақстанның ҰҚК-нің бұрынғы басшысы Кәрім Мәсімовтің бұрынғы күйеу баласы Азамат Кәпеновтің кіші інісі, деп хабарлайды Orda.kz.

Іздеуге негіз болған себептер мен айыптаулар туралы нақты мәліметтер әзірге жарияланған жоқ. Бұл Мәсімовтерге қатысты Ресей жариялаған екінші іздеу.

Бұған дейін, биыл Қазақстан Антикорының бастамасымен Азамат Кәпенов халықаралық іздеуде болған еді.

Мэдер Кәпенов Қырғызстанда дүниеге келген, 2000 жылдардың соңынан бастап Мәскеуде өмір сүріп, білім алған. Ол Қазақстандағы «Трансконтейнер Евразия» және «Евротранс Актив» логистикалық компанияларының иелерінің бірі болған.

Ресейде ол «Рубиус» деп аталатын жылжымайтын мүлікпен айналысатын компанияның иесі болған. 2022 жылдың мамырында Кәпенов қазақстандық төлқұжатын сақтай отырып, Қырғызстан азаматтығын алған.