Ресейде қазақстандық жоғарғы оқу орындарының филиалдары ашылады

Ресейде қазақстандық жоғарғы және жоғарғы оқу орнынан кейінгі білім беру ұйымдарының филиалдары ашылады. Бұл туралы премьер-министрдің сайтында жазылды.

Қазақстан мен Ресей үкіметі Ресейде қазақстандық жоғарғы оқу орындарының филиалдарын және Қазақстанда ресейлік жоғарғы оқу орындарының филиалдарын құру туралы келісімге қол қою туралы қаулы қабылдады. Филиалдарды ашудағы мақсат – техникалық кадрларды дайындау.

Филиалдар тараптар мемлекеттерінің заңнамасына сәйкес паритеттік негізде ашылады.

– Білім беру бағдарламалары аясында филиалдар орналасқан елдің тілі мен тарихын міндетті түрде зерттей отырып, білім беру екі елдің мемлекеттік тілдерінде жүргізілуі мүмкін. Филиалдардағы мемлекеттік бақылау және аккредиттеу тараптар мемлекеттерінің заңнамасына сәйкес жүзеге асырылатын болады, - делінген хабарламада.

11 қаңтарда Мәжіліс отырысында Қасым-Жомарт Тоқаев еліміздегі жоғары оқу орындарына қолжетімділік мәселесі өзекті болып қала беретінін айтты. Тоқаев 2025 жылға дейін Қазақстанда беделді шетелдік университеттердің кем дегенде бес филиалын ашуды тапсырды.