Ресей Украинаға кезекті ең ірі әуе шабуылын жасады

Ресей қарашаның 17-не қараған түні тамыз айынан бері бірінші рет Украинаға біріккен зымыран мен ұшқышсыз ұшақтар арқылы соққы беріп, маңызды инфрақұрылымдарды нысанаға алды, деп хабарлайды Orda.kz сайты BBC-ге сілтеме жасап. 

Елде төтенше жағдайға байланысты электр қуаты үзілді. Бес адамның қайтыс болғаны белгілі болды. Владимир Зеленскийдің айтуынша, жексенбі күні ресейлік әскерилер Украинаға шабуыл жасау үшін 120-ға жуық зымыран мен 90 ұшқышсыз ұшақ пайдаланған.

Украина сыртқы істер министрі Андрей Сибига Ресей соғыс басталғалы бері «ең ірі әуе шабуылдарының бірін» жасағанын айтты.

Украина Қарулы Күштерінің Әскери-әуе күштері сегіз жоғары дыбысты «Қанжардың» жетеуін және бір «Цирконды», сондай-ақ тағы 89 қанатты зымырандар мен бес ұшақты атып түсіре алғандарын мәлімдеді.

Мәлімдемеге сәйкес, шабуылға жеті стратегиялық бомбалаушы және екі алыс қашықтыққа ұшатын бомбалаушы ұшағы, сондай-ақ басқа да ұшақтар қатысқан.

Ресей Қорғаныс министрлігі жексенбі күні таңертең ресейлік әскерилер «дәл басқарылатын қару-жарақпен» және ұшқышсыз ұшақтармен Украинадағы «маңызды энергетикалық инфрақұрылымға» жаппай соққы бергенін хабарлады.

Ресей Қорғаныс министрлігі бұл нысандар әскери-өнеркәсіптік кешеннің жұмыс істеуін қамтамасыз етті деп мәлімдейді. Мәлімдемеде айтылғандай, шабуыл «әскери өнім шығаратын кәсіпорындарға» да жасалған.

Киевтің әскери әкімшілігі «Украинаның барлық дерлік аумағы шабуылға ұшырады» деп хабарлады.

Ресей 2022 жылдың соңынан бері Украинаның энергетикалық инфрақұрылымына шабуыл жасауда. Энергетикалық кешен айтарлықтай зардап шекті. Украина билігі ауа райы суыған кезде шабуылдар қайталанатынын білген.