Ресей-Украина: Министр Қазақстанның ұстанымын айтты

Премьер-министрдің орынбасары - сыртқы істер министрі Мұхтар Тілеуберді «Хабар 24» телеарнасына сұхбат беріп, Қазақстанның Ресей-Украина қақтығысына қатысты ұстанымын айтты.

- Еліміз Ресей-Украина қақтығысын келіссөздер мен дипломатия арқылы тезірек шешуді үнемі жақтап келеді. Қақтығыстың алғашқы күндері Президент Қасым-Жомарт Тоқаев Ресей және Украина президенттерімен телефон арқылы сөйлесіп, тараптарды қақтығысты шешудің бейбіт жолдарын тауып, келіссөздер процесін бастауға шақырғаны белгілі. Қазақстанда Ресеймен тарихи тұрғыдан тығыз саяси-экономикалық және мәдени-гуманитарлық байланыс қалыптасқан. Дүниежүзіндегі ең ұзын шекараға ие бола отырып, ресейлік әріптестермен сауда-экономикалық ынтымақтастықтың қалыптасқан деңгейін сақтауға ниеттіміз. Жалпы, құқықтық және саяси жағынан біздің мемлекеттер одақтас және стратегиялық серіктес.

- Сонымен қатар, қақтығыс аяқталғаннан кейін Украинамен де кең ауқымды өзара тиімді ынтымақтастықтың жоғары динамикасын тез арада қалпына келтіруге мүдделіміз. Бұл екі ел арасындағы әскери қақтығыс қазақстандықтардың жүрегіне батты. Сондықтан, Мәскеу мен Киев таяу болашақта келіспеушіліктерді бейбіт жолмен шешудің жолын табады деп шын жүректен сенеміз, - деді Мұхтар Тілеуберді.

Сондай-ақ, СІМ басшысы Қазақстанның қарулы қақтығысты тоқтату және бітімгершілік жағдайға жан-жақты үлес қосып отырғанын жеткізді.