Ресей түрмесіндегі азапты видеоны кім жариялады?

Gulagu.net құқық қорғау ұйымы Ресей түрмелерінде тұтқындарды зорлау мен азаптау туралы 40 гигабайттық видеоны берген ер адаммен сұхбат жариялады.

Бұл туралы Orda.kz хабарлады.

Gulagu.net сайтының негізін қалаушы Владимир Осечкиннің айтуынша, оларға бейнежазба берген адамның аты Сергей. Ол Беларусь азаматы, мамандығы бойынша бағдарламашы. 2015 жылы Сергей есірткі бабымен әділетсіз сотталып, жазасын Саратов облысында өтеуге жіберілді. Онда ол Федералды қылмыстық атқару қызметі (ФСИН) облыстық департаментінің №1 туберкулез ауруханасында бейнебақылау әкімшісі болды. Құқық қорғау ұйымы жариялаған видеолардың көбі осы ауруханада түсірілген.

Түрмеден шыққаннан кейін Сергей Еуропадан саяси баспана сұрап, Осечкинмен байланысқа шықты. Себебі ол тұтқындарға жасалған зорлық-зомбылық туралы «халыққа жеткізгісі келді». Бағдарламашы азаптауды көрген, бірақ оған қатыспаған.

Еске салсақ, бұл атышулы видеолар қазан айында жарияланған.