Ресей шекарасында Қырғызстан жүк көліктері қатаң бақылауға алынған

Қырғызстандық тасымалдаушылар Ресей шекараларындағы  жүк тиелген көліктерін өткізбей жатқандығына  шағымданды.

Қырғыз жүк тасымалдаушылары Ресей шекарасындағы түсінбеушілік жағдайға шағымданып, бейнежазба жариялады. Бақылау бекеттерінде жүргізушілерге түсіндірместен барлық жүкті көліктерінен толығымен түсіруге мәжбүр еткен.

Жүк тасымалдаушылар Vesti.kg сайты редакциясына шекарадағы жағдай туралы видео жіберді. Жүргізушілер өздерінің шекарада бірнеше күн тұрып қалғанын, ал Тәжікстан мен Өзбекстаннан келген жүк көліктер емін-еркін өтіп жатқанын алға тартады.

— Жүргізушілеріміз шекарада бірнеше күн тұрып қалды. Ресейлік шекарашылар біздің көліктерді өткізбейді. Жүргізушілер арасында бұл Ресей тарапының Қырғызстаннан тыйым салынған жүктерді тасымалдаудан қауіптенуінен деген қауесет бар. Неліктен біздің билік Ресейдің мұндай әрекеттеріне ешқандай реакция жасамайды? Тәжікстан мен Өзбекстанның көліктері емін-еркін өтіп жатыр, – деп ашуланды видео авторы.

Осыдан бірнеше күн бұрын Қырғызстанның Экономика министрлігі жүк тасымалдауда еш қиындық болмағанын хабарлаған.

Сонымен қатар, қырғыз-қазақ шекарасында да осындай жағдай орын алуда. Онда да жүк көлігі жүргізушілері бірнеше күн кезекке тұрып, жүктерін толығымен түсіруге мәжбүр болғанын айтып шағымданды.

ҚР Қаржы министрлігінің Мемлекеттік кірістер комитеті шекарада бақылау күшейтіліп,  салықтық тексерулер жүргізіліп жатқанын, соның нәтижесінде Қытайдан әкелінген контрабандалық тауарларға (ілеспе құжатсыз) тексеріс жүріп жатқанын түсіндірді.