Ресей, Өзбекстан және Қазақстанның газ одағы туралы келіссөздер жүріп жатыр - Ресей СІМ

Ресей Сыртқы істер министрлігі Өзбекстанның «одақтар мен альянстар» арқылы энергия мен газ сатып алудан бас тартқаны туралы бұған дейін БАҚ-та жарияланған ақпаратты жоққа шығарады.

Ресей Сыртқы істер министрлігінің Ерекше тапсырмалар жөніндегі елшісі Юрий Сентюрин Мәскеу, Астана және Ташкент арасында газ одағы мәселелері бойынша диалог жалғасып жатқанын мәлімдеді, деп хабарлайды РИА Новости.

Ол медиа-кеңістікте келіссөздерге қатысушылардың, атап айтқанда Өзбекстан өкілдерінің сөздерінен алынған дәйексөздер келтірілгенін атап өтті.

— Осы негізде Өзбекстандағы әріптестеріміз бұл істі қандай да бір түрде қабылдамайды деген қорытынды шығарылды. Бірақ қазір келіссөздер жүргізілуде, бұнымен мәміленің аяқталмағанын түсінеміз, - деді дипломат.

Оның айтуынша, қазір тараптар ұсыныстарды зерделеуде.

Еске салайық, қарашаның соңында президент Тоқаев Мәскеуге жұмыс сапарымен барған болатын. Одан кейін оның баспасөз хатшысы Руслан Желдібай Кремльде мемлекет басшылары ресейлік газды ел аумақтары арқылы тасымалдаудағы іс-қимылдарды үйлестіру мақсатында Ресей, Қазақстан, Өзбекстаннан тұратын «үшжақты газ одағын» құру мәселесін талқыланғанын айтты.

Бұдан кейін Өзбекстанның Энергетика министрі Журабек Мирзамахмудов журналистерге Ташкенттің көрші елдерден газ бен электр қуатын импорттау бойынша келіссөздер жүргізіп жатқанын, бұл  «кейбір одақ немесе альянс арқылы емес, коммерциялық келісімшарттар негізінде» екенін айтқан болатын.