Ресей өз аумағы арқылы Қазақстаннан көмір тасымалдауға тыйым салғысы келеді

Ресейдің Энергетика министрлігі қазақстандық көмірдің транзитіне тыйым салуды ұсынып отыр, деп хабарлайды «Ведомости».

Ресей де, Қазақстан да ЕАЭО-ға мүше болғанымен, Ресей шенеуніктері көршілеріне шектеу қою арқылы өздерінің көмір экспорттаушыларын қолдау қажет деп санайды.

Бұл бастама Ресей вице-премьері Александр Новакпен көмір экспортын дамыту мәселелеріне арналған кездесуде көтерілді. Ресейлік көмір экспорттаушыларын қолдау үшін Ресей билігі «темір жол инфрақұрылымының көліктік мүмкіндіктерін бөлуде аймақтарға басымдық беруді» алып тастауды және тасымалдаудың артықшылығын қамтамасыз ету және үшінші елдерден көмір транзитіне уақытша тыйым салуды ұсынды.

Айта кетсек, қаңтардан мамырға дейін (Украинадағы соғыс аясында) Қазақстан Еуропалық Одаққа көмірді өткен жылмен салыстырғанда көбірек жеткізген.

Қазақстан Еуропа елдеріне көмірді негізінен Ресей немесе Балтық жағалауы елдері порттарында ауыстырып тиеп, теңіз арқылы (осы жылы 782 мың тонна және өткен жылы 240 мың тонна), темір жолмен (тиісінше 635 мың және 540 мың тонна) және автомобиль жолымен (тиісінше 635 мың тонна және 540 мың тонна) тасымалдайды.

Жалпы алғанда, өткен жылы Қазақстан 29,2 млн тонна көмір экспорттаса, оның ішінде негізгі бағыттар бойынша Ресей (19 млн тонна), Швейцария (4,8 млн тонна) және Беларусь (1,9 млн тонна) болды.