Ресей обыр дертіне қарсы алғашқы екпе дайын екенін мәлімдеді

Ресей ғалымдары онкологиялық ауруларға қарсы екпе жасады. Препараттың қауіпсіздігі мен жоғары тиімділігі дәлелденген, деп хабарлайды Orda.kz.

Бұл туралы «Известия» басылымына берген сұхбатында Ресейдің Федералды медико-биологиялық агенттігінің (ФМБА) басшысы Вероника Скворцова мәлімдеді.

Оның айтуынша, 2025 жылдың жазының соңында ФМБА бұл вакцинаны клиникалық қолдануға рұқсат алу үшін Денсаулық сақтау министрлігіне тиісті құжаттарды тапсырған.

«Клиникалық зерттеулер бұл вакцинаның ісік көлемін азайтып, оның өсуін 60–80 пайызға дейін баяулатуға қабілетті екенін көрсетті», – деді Скворцова.

Алғашқы кезеңде бұл препаратты тоқ ішек пен тік ішек қатерлі ісігін (колоректальды рак) емдеуге қолдану жоспарланған. Бұдан бөлек, глиобластома мен меланомаға қарсы вакциналар да әзірленіп жатыр.

Бұған дейін, 2025 жылғы 10 маусымда, Қазақстанның Ғылыми онкология және радиология зерттеу институтының басшысы Ербол Бекмұхамбетов Орталық коммуникациялар қызметінде өткен брифингте Қазақстанда да обырға қарсы жаңа дәрі жасалып жатқанын айтқан болатын.

Биылғы наурыз айында Ғылым және жоғары білім министрі Саясат Нұрбек обырға қарсы жаңа қазақстандық препараттың клиникалық сынақтары екінші кезеңге шыққанын және сынақтардың сәтті өтіп жатқанын мәлімдеді.