Ресей мен АҚШ арасындағы диалог үміт ұялатады – Тасмағамбетов

Ұжымдық қауіпсіздік туралы шарт ұйымының бас хатшысы Иманғали Тасмағамбетов Ресей мен АҚШ арасындағы саяси-дипломатиялық диалогқа қатысты пікірін білдірді, деп хабарлайды Orda.kz.

Тасмағамбетовтың айтуынша, Ресей мен АҚШ арасындағы диалогқа оптимизммен қарауға болады.

«Ресей мен АҚШ арасында саяси-дипломатиялық диалог жүріп жатыр. Бұл сақтықпен қараған күннің өзінде, оптимизм тудыратын жағдай. Әлемдегі әскери-саяси жағдайды тұрақтандыру тұрғысынан ресейлік және америкалық өкілдердің байланыс орнатуының өзі – маңызды факт. Ресей мен АҚШ арасындағы диалогтың мультипликативтік әсері жаһандық үдерістерге тікелей ықпал ететіні күмәнсіз. Бұл Еуразияның әртүрлі аймақтарында, соның ішінде ҰҚШҰ-ның жауапкершілік аймағында шиеленісті азайтуға септігін тигізеді», – деді Тасмағамбетов.

Сонымен қатар, Тасмағамбетов Үндістан мен Пәкістан арасындағы қарым-қатынастың күрт шиеленісуі алаңдаушылық тудыратынын атап өтті. Бұл жағдай қазірдің өзінде қарулы қақтығыстарға алып келгенін айтты.

Сондай-ақ, Иманғали Тасмағамбетовтың айтуынша, соңғы кездері жағдай біршама тынышталғанымен, қақтығыстың қайтадан өршіп кетуі қауіпті болып отыр. Халықаралық қауымдастық бар күш-жігерін жағдайды ушықтырмай, бейбіт шешім табуға бағыттауы тиіс екені айтты.