Ресей кинотеатрларында қазақ, үнді, қытай фильмдерін көрсету ұсынылды

Ресейде депутат Елена Драпеко Ресей прокатындағы батыс фильмдерін қытай, үнді, қазақ және өзбек фильмдеріне ауыстыруды ұсынды.

Американдық Warner Bros Украинадағы жағдайға байланысты ресейлік кинотеатрларда «Бэтмен» фильмінің шығуын тоқтатты. Супер қаһармандық экшн фильмінің премьерасы 3 наурызда өтуі керек еді. Сондай-ақ, Sony, Walt Disney және Paramount компаниялары ресейлік кинотеатрларға фильмдерді жеткізуді тоқтату туралы шешімді қабылдады.

– Мен Қытайда болдым, тамаша тарихи, костюмдік фильмдерді көрдім. Бұл фильмдер біздің көрермендерге қолжетімді болады. Мұндай фильмдерді сатып алу туралы келісуіміз керек, - деді Драпеко.

Ол қазіргі отандық кинонарық сұранысын ресейлік прокатта көп көрсетілмеген елдердің фильмдерімен жабуға болатынын атап өтті.

– Бұл, ең алдымен, отандық кинематографияға берілген мүмкіндік деп есептеймін. Бізде жақсы фильмдер бар. Ал, осы уақытқа дейін аз көрсетіліп келген елдердің фильмдерін қараңызшы. Үндістанның, Қытайдың, Оңтүстік Кореяның фильмдері бар. Әрине, көршілеріміз – ТМД елдерінің киносы да баршылық. Қазақстанның, Өзбекстанның өте қызықты фильмдері бар, олар көрсетуге әбден лайық, - деді Драпеко.