Ресей Донбасс пен Қырымды иеленуі мүмкін

Bloomberg агенттігінің мәліметіне сүйенсек, Ресей мен АҚШ арасында келіссөз жүріп жатыр. Онда Мәскеудің бақылауындағы территорияларды ресми түрде Ресейге бекіту және Украинадағы бірқатар өңірлерде шабуылды тоқтату мәселелері қарастырылуда, деп хабарлайды Orda.kz.

Келіссөзде сөз болып отырған аймақтар — Донецк және Луганск халық республикалары (ДХР және ЛХР), сондай-ақ Қырым түбегі. Бұл келісім 15 тамызда өтеді деп жоспарланған Владимир Путин мен Дональд Трамптың кездесуіне орай дайындалып жатыр.

Қол қойылуы тиіс құжат жобасының мақсаты — қақтығысты уақытша тоқтатып, атысты доғару және жанжалды толық реттеу жөніндегі техникалық келіссөздерге жол ашу. Жоспар бойынша, Ресей армиясы қазіргі майдан шебі бойынша Херсон және Запорожье облыстарындағы шабуыл әрекеттерін тоқтатуы тиіс.

Bloomberg дереккөздері бұл келісімнің шарттары әлі түпкілікті емес екенін, әрі өзгеруі мүмкін екенін айтады. Мәскеу қазіргі бақылауындағы кейбір аумақтардан, соның ішінде Запорожье атом электр станциясынан, бас тартуға дайын ба — әзірге белгісіз.

Айта кетейік,  8 тамыз Дональд Трамптың Владимир Путинге бейбіт шешімге келу үшін берген мерзімінің соңғы күні. Алғашында ол 50 күн деп белгіленген, кейін бұл уақыт 10–12 күнге дейін қысқартылған болатын. Егер алға жылжу болмаса, Трамп Ресейге және оның  сауда серіктестеріне қосымша экономикалық санкциялар енгізетінін мәлімдеген.

АҚШ президенті сәуір айында Ресейге қарсы санкциялар пакетін  бір жылға ұзарту туралы жарлыққа қол қойған болатын.