Ресей Байқоңырды 2050 жылға дейін жалға алады: Сенат түзету енгізді

Сенат Қазақстан үкіметі мен Ресей үкіметі арасындағы Байқоңырды жалға алу шартына Ресей тарапына ғарыш айлағын жалға беруді 2050 жылға дейін ұзартуға мүмкіндік беретін түзетулерді қабылдады.

«Байқоңыр» кешенін жалға беру шартының 4 - бабына түзетулер енгізу бөлігінде хаттаманы ратификациялау туралы заң жобасы «Байқоңыр» кешенін жалға алу мен пайдалануды 2050 жылға дейін ұзарту туралы міндетті іске асыруға мүмкіндік береді» делінген сенаттың халықаралық қатынастар, қорғаныс және қауіпсіздік комитетінің қорытындысында.

Хаттаманы ратификациялаудағы күтілетін нәтиже - бұрын алынған міндеттемелерді үйлестіру, бұл «Байқоңыр» кешенінің ғылыми-техникалық, өндірістік, әлеуметтік-мәдени әлеуетін сақтауға, тиімді пайдалануға және дамытуға мүмкіндік береді, сондай-ақ өңірдегі әлеуметтік-экономикалық тұрақтылықты қамтамасыз етпек.

Қазақстан бюджетіне Байқоңырды пайдаланғаны үшін жыл сайын 115 миллион доллар көлемінде жалдау ақысы түседі. Кешенді жалға берудің 27 жылы ішінде бюджетке үш миллиард доллардан астам қаражат түсті.