Ресей азаматы военкоматқа қолдан жасалған қарудан оқ атқан

Әлеуметтік желіде Ресейдің Иркутск облысында қарулы адамның әскери комиссарға оқ атқан видеосы пайда болды.

Атқан адам сол күні жұмылдырылуы тиіс 25 жастағы жұмыссыз жігіт болуы мүмкін. Куәгерлердің айтуынша, ғимаратта металл іздегіш болмағандықтан, ер адам қолдан жасалған қаруды жайбарақат алып жүрген.

Бұл Ресейдегі ішінара жұмылдыруға алаңдаушылықтың бірінші оқиғасы емес. Волгоград облысында белгісіз біреу көлікпен әскери комиссариат ғимаратына жақындап келіп, молотов коктейльдерін лақтыра бастаған.

Mediazona агенттігінің хабарлауынша, Украинада соғыс қимылдары басталғаннан бері Ресейде барлығы 54 әскерге шақыру пункті мен мемлекеттік кеңселер өртеніп кеткен. Оның 17-сі – жұмылдыру жарияланғаннан кейін.

Еске салсақ, Ресей президенті Владимир Путин 21 қыркүйектен бастап ішінара жұмылдыру туралы хабарлаған болатын. Ол әскери қызметке шақырылғандар бөлімдерге жіберілмес бұрын міндетті түрде қосымша дайындықтан өтетінін мәлімдеді.

Путиннің ішінара жұмылдыру туралы мәлімдемесі Украинаның шығысында, Херсон облысы мен Запорожье облысының бір бөлігінде Ресейге қосылу туралы «референдум» деп аталатын күндердің белгіленгені белгілі болғаннан кейін бір күн өткен соң жасалды. Жергілікті билік оларды 23-27 қыркүйекке белгіледі. Украина мұндай дауыс беру нәтижелерін мойындамайтынын бірнеше рет мәлімдеген.

Ресейде жұмылдыру жарияланған күні 30-дан астам қалада өткен жаппай митингілер басталды. Соңғы мәліметтер бойынша, мыңнан астам адам ұсталған. Ереуілшілер «Соғысқа жол жоқ», «Путин окопта» деп ұрандатты.