Ресей әншісі Юрий Шевчук Астанада өткен концертінде Навальныйға арнап ән айтты

18 ақпанда Ресей әншісі Юрий Шевчук Астанада өткізген концертінде «Еркіндік» деп аталатын танымал әнін Алексей Навальныйды еске алуға арнады, деп хабарлайды Orda.kz порталы.

"Күн шығады. Ресейліктерге еркіндік туралы айтып жүрген Алексей Навальный өлді. Ол еркіндік туралы айта жүріп, шын мәніндегі еркіндікте өмір сүре алатынымызды ұдайы еске салатын. Ол еркіндіксіз сенім - фанатизм, еркіндіксіз еңбек - арзан, ауыр құлдық, еркіндіксіз махаббат – деспотия, еркіндіксіз ештеңе болмайды дейтін",- деді ол ән айтар алдында.

Шевчук бұған дейін де Ресей саяси тұтқындарын, соның ішінде Алексей Навальныйды әлденеше рет қолдап сөйлеген болатын.

Ресей Украинаға жаппай басып кірген соң Шевчук Владимир Путинді жұрт алдында сынаған. Ал осыдан кейін оның Ресейдегі барлық концерті тоқтатылып, «Ресей қарулы күштеріне кір келтіргені үшін» өзіне айыппұл салынған.

16 ақпанда Ресей түрмесінде оппозиционер Алексей Навальный қайтыс болды. «Тергеу комитеті тексереді» деген желеумен Навальныйдың денесін әзірге туыстарына бермеген. Оппозиционердің жақтастары «Навальныйды өлтірді» деп есептейді.