Рамзан Қадыров ұлының апатқа ұшырағанын жоққа шығарып, оған кезекті марапат берді

Шешен Республикасының басшысы Рамзан Қадыров ұлының ауыр жол-көлік оқиғасында зардап шеккені туралы сыбысты жоққа шығарып,  Адам Қадыровқа тағы бір марапат табыс етілгенін мәлімдеді, деп хабарлайды Orda.kz.

Қадыров Telegram-арнасында ұлы Адам Қадыров республиканың күштік құрылымдарының командирлерімен кеңес өткізгені туралы хабарлама жариялады. 

Оның айтуынша, онда алдағы сайлауды өткізуге дайындық, оны өткізу кезінде қоғамдық қауіпсіздікті қамтамасыз ету, экстремизммен күрестің алдын алу және т.б. мәселелер талқыланыпты.

 Сондай-ақ, ол Адам Қадыровқа «Атом станциялары қауіпсіздігін арттыруға сіңірген еңбегі үшін» алтын медалі берілгенін хабарлады.

Еске салсақ, былтыр Дәурен Абаев Рамзан Қадыровтың 17 жастағы ұлының үйлену тойына барғанын растады. 28 маусым күні Грозный маңындағы Ахмат Юрт ауылында Рамзан Қадыровтың 17 жастағы ұлы Адамның үйлену тойы өтті. Тойға Қазақстанның Ресей Федерациясындағы елшісі Дәурен Абаев қатысқаны туралы ақпарат шыққан еді.

«Мен тек Мәскеудегі елші ғана емеспін, жалпы Ресей Федерациясындағы елшімін. Сол себепті аймақтарға да үнемі барамын. Қазақ пен шешен халықтарының арасында өте тығыз, достық қатынастар бар. Мыңдаған шешеннің Қазақстанға депортацияланғанын біз ұмытқан жоқпыз. Сол сияқты, қазақ халқы қиын жағдайға тап болған шешендерді тастамай, қол ұшын созғанын шешен ұлты да ұмытпады. Мен ең алдымен осы достықтың белгісі ретінде бардым», — деді Абаев. 

Бұған дейін бірнеше БАҚ бірден Шешен Республикасы басшысының ұлы Рамзан Қадыровтың кортежі ауыр жол-көлік оқиғасына ұшырағаны туралы хабарлаған болатын. Олар жазған ақпаратта Адам Қадыров ауыр халде ауруханаға жатқызылған.