Рамазан айында вирус жұқтырғандар саны арта түскен

Барша мұсылман халқы үшін қасиетті саналатын Рамазан айының аяқталуына аз қалды. Қазақстан Мұсылмандары Діни Басқармасы қарсы көрсетілімдер болмаса, ораза ұстауға болатындығын, тіпті екпе алу да шариғатқа қайшы келмейтінін ескертті.

Пандемия тұсында ораза ұстаудың шарттары өзгермегенімен, бірқатар ескертпелер мен шектеулер енгізілгені анық. Алайда бұл шарттар дұрыс сақталмағандықтан жағдай ушыға түскен.

Ораза тұсында қаладағы эпидахуалдың қалай өзгергенін Алматы қаласының санитариялық-эпидемиологиялық бақылау департаменті басшысының орынбасары Әсел Қалықова айтып берді.

- Рамазан айы Алматы қаласының тұрғындарының эпид-ахуалына белгілі деңгейде әсер еткені байқалды. Атап айтсақ, соңғы аптада коронавирус ауруына ұшырағандар - ағайын-туыс, жолдас-жора, көршілермен қарым-қатынаста аурудың жұғуы 1 аптада 0,5 пайызға ұлғайды (сәуірдің 12 күндеріндегі аптада 3,0 пайыздан 1-ші мамырдағы аптада 3,5 пайызға дейін өскен).

Рамазан айы сәуірдің 12 күні басталса, содан бері коронавирус ауруының қарқыны төмендемей тұр. Наурыз айына қарағанда сәуір айында коронавирус ауруына шалдыққандардың саны 2 есе өсті – 9525 адамнан 19918 адамға дейін. Қалада мутацияға ұшыраған вирус наурыз айының басында тұрғындар арасында тарай бастап, бүгінгі таңда кеңінен белең алуда: қаңтар айында 3607 ауру анықталса, ақпан айында - 2945, наурыз айында - 9525, сәуір айында - 19918, мамыр айының 4 күнінде 2655 жағдай анықталды. Алматы қаласында бір күнде 650-ден астам адам ауруға шалдығуда. Бұл айда вирустың өрши түсуіне жұғу қабылеті жоғары мутацияға ұшыраған вирус штаммы себеп, болып отыр, - дейді Әсел Қалықова.

- Сонымен бірге, індетті ауыздықтау мақсатында қабылданған арнайы шектеу шараларын тұрғындар тарапынан мойынсынбау, санитарлық талаптарды бұзу, қоғамдық жерлерде бетперде тақпау немесе дұрыс қолданбау сияқты жағдайлары жиі кездеседі. Жиын-тойларды, ас беруді, ауыз-ашар сынды басқа да жиындарды тоқтата тұрмай, вирустың өршіп жатыр. Мұндай жағдайда індетті ауыздықтаудыңбір-ақ жолы бар –ол коронавирусқа қарсы егуді іске асыру. Қала тұрғындарының кем дегенде 70 пайызын егумен қамтығанда бұл індетті ауыздықтай аламыз, - дейді басқарма қызметкері.

Бүгінгі таңда екпемен тұрғындардың 11 пайызы ғана қамтылған екен.

Сабина Зәкіржанқызы