Рақымшылыққа іліккен Жомарт Ертаев бостандыққа шықты

53 жастағы банкир, 2020 жылы RBK Bank-тен 144 млрд теңге ұрлады деп сотталып, жалпы режимдегі колонияда жазасын өтеп келген Жомарт Ертаев рақымшылыққа ілікті, деп хабарлайды Orda.kz.

Kozachkov offside telegram-арнасының мәліметінше, Ертаев кінәсін мойындап, тергеуге көмектескен әрі шығынды өтеуге қатысқан.

Ол 2 қыркүйекте жалпы режимдегі колониядан босатылған, бірақ бұл туралы ақпарат тек қазір белгілі болды.

Бастапқыда Ертаев 11 жылға сотталған еді. Кейін ол QazaqBank-тен (46 млрд теңге) және «Еуразиялық банктен» (24 млрд теңге) ірі көлемде қаражат жымқырғаны үшін қайта сотталды, бірақ бұл жалпы мерзімге әсер етпеді.

Ертаевқа тергеу изоляторында өткізген әр күні бір жарым күн ретінде есептелді. Ол Қазақстанға экстрадицияланғаннан кейін және апелляция мерзімінде уақытша изоляторда ұзақ отырған. Үкім бойынша оның жазасын өтеу мерзіміне бір жылдан аз қалғандықтан, сот оған рақымшылық қолданды.

«Ордаға» бұл ақпаратты ҚАЖК  растады.