ҚР Сыбайлас жемқорлыққа қарсы қызметі төрағасының бірінші орынбасары тағайындалды

Дмитрий Малахов ҚР Сыбайлас жемқорлыққа қарсы қызметі төрағасының бірінші орынбасары болып тағайындалды.

Мемлекет басшысы Дмитрий Малаховты Қазақстан Республикасы Сыбайлас жемқорлыққа қарсы іс-қимыл агенттігі төрағасының бірінші орынбасары қызметіне тағайындады, деп хабарлайды Ақорданың баспасөз қызметі.

Мемлекет басшысының Өкімімен:

2022 жылғы 7 наурызда Малахов Дмитрий Михайлович Қазақстан Республикасы Сыбайлас жемқорлыққа қарсы іс-қимыл агенттігі (Сыбайлас жемқорлыққа қарсы қызмет) төрағасының бірінші орынбасары қызметіне тағайындалды, ол Қазақстан Республикасы Сыбайлас жемқорлыққа қарсы іс-қимыл агенттігі төрағасының орынбасары қызметінен босатылды.

1974 жылы 23 тамызда Ақмола облысы, Көкшетау қаласында дүниеге келген. Қазақстан Республикасы Ішкі істер министрлігінің Алматы жоғары мектебін (1995), Т. Рысқұлов атындағы Экономика және қаржы университетін бітірген (2005).

ІІ дәрежелі «Айбын» орденімен, мерейтойлық және ведомстволық наградалармен марапатталған.

Ішкі істер органдарында, қаржы полициясында, сыбайлас жемқорлыққа қарсы қызметте және экономикалық тергеу қызметінде қызмет еткен.

Ол Ішкі істер министрлігінің тергеушісінен Қаржы полициясының облыстық және орталық аппараты мен Сыбайлас жемқорлыққа қарсы іс-қимыл ұлттық бюросы басқармалары бастығының орынбасарына дейін өтті.

Сыбайлас жемқорлыққа қарсы қызметке келгенге дейін Қазақстан Республикасы Қаржы министрлігі Қаржы мониторингі комитетінің Жедел департаментінің басшысы қызметін атқарған.