ҚР Премьер-министрі ЕАЭО екпе төлқұжаттарын өзара тануға шақырды

ҚР Премьер-министрі Асқар Мамин Еуразиялық экономикалық одақ (ЕАЭО) елдері аумағы бойынша вакциналанған туристердің қозғалысын жеңілдету, сондай-ақ екпе төлқұжаттарын өзара мойындау туралы айтты.

Бұл туралы Orda.kz РИА Новостиге сілтеме жасап хабарлады.

Бүгін, 20 тамыз Асқар Мамин Шолпан-Атада (Қырғызстан) өткен Еуразиялық үкіметаралық кеңестің отырысында сөйледі. Ол одақ елдері дағдарыстың ең өткір кезеңін сәтті жеңіп шыққанын айтты. ЕАЭО-ға мүше елдерге COVID-19 ең көп әсер ететін экономика секторларын, атап айтқанда туризмді дамыту бойынша жұмысты қайта бастау керектігін алға тартты.

Ол бұл бағыттағы негізгі міндеттердің бірі - екпе төлқұжаттарын өзара мойындау, карантин режимі жеңілдетілген бірлескен туристік аймақтарды қалыптастыру, цифрлық инфрақұрылымды одан әрі дамыту екенін атап өтті.

– Туризм саласындағы белсенділікті қалпына келтіру бойынша шұғыл шараларды қабылдамау өнеркәсіптің ұзақ мерзімді өсу әлеуетінің төмендеуіне әкелуі мүмкін. Оның ішінде адамдық және физикалық капиталдың, сондай-ақ инвестициялардың жоғалуына байланысты, - деді Мамин.

Еске салсақ, ЕАЭО елдерінің үкіметаралық кеңесі мүше елдердің премьер-министрлерінің қатысуымен бейсенбі және жұма күндері Шолпан-Атада (Қырғызстан) өтті. Іс-шара нәтижесінде көлік, тарифтік реттеу, Одақ аясындағы сауда кедергілерін алып тастау, цифрлық трансформация және басқалары бойынша құжаттар топтамасы қабылданды.