Қызылорда облысында кене шаққан екі адам қайтыс болды

Жаңақорған ауданынан 77 жастағы ер адам мен Шиелі ауданының 51 жастағы тұрғыны кене шағып, ауруханаға жеткізілді. Артынша олар жансақтау бөлімінде көз жұмды, деп хабарлайды Хабар 24.

Жыл басынан бері облыстың медициналық мекемелеріне кене шағуына байланысты 600-ден астам адам шағымданған. Олардың 23-і Конго-Қырым геморрагиялық қызбасы күдігімен ауруханаға жатқызылды. 8 жағдайда диагноз расталды. Қауіпті жәндіктердің мекендейтін табиғат орындарында эпидемияға қарсы шаралар жүргізілуде.

«Әрбір жағдайды тіркеген кезде 12 сағат ішінде жеке аумақтарды, мал қораларды және жануарларды дезинфекциялау жүргізіледі. Барлық байланыста болған адамдар 14 күн бойы дәрігерлердің бақылауында болады. Жалпы, үш ай – мамыр, маусым және шілде – кенелердің қауіпті түрлерінің белсенді уақыты. Сондықтан облыс тұрғындарын абай болуға және кене шаққан жағдайда дереу дәрігерге хабарласуға шақырамыз», - дейді Қызылорда облысы бойынша санитарлық-эпидемиологиялық бақылау департаменті басшысының орынбасары Әлия Әбдіқайымова.