Қызылорда облысында білім саласындағы миллиондаған қаржы жымқыру фактісі анықталды

Қызылорда облысы бойынша сыбайлас жемқорлыққа қарсы қызмет Жаңақорған аудандық білім бөлімінің басшысы мен есепшісіне қатысты Қылмыстық кодекстің 189-бабы 4-бөлігі, 2-тармағы бойынша қозғалған қылмыстық істі тергеп жатыр, деп хабарлайды ведомствоның баспасөз қызметі.

Олар білім беру ұйымдарының қызметкері емес тұлғалардың карточкалық шоттарына жалақы түрінде ақша аудару арқылы 543 млн теңге бюджет қаражатын жымқырды деген күдікке ілінді.

Қызылорданың мамандандырылған тергеу соты санкциясымен күдіктілер уақытша ұстау изоляторына қамауға алынды.

Қылмыстық-процестік кодекстің 201-бабына сәйкес өзге де мәліметтер тергеу мүддесінде таратылуға жатпайды.

Сонымен бірге, Конституцияның 77-бабының 3-тармағының 1-тармақшасына және Қылмыстық-процестік кодекстің 19-бабының 1-бөлігіне сәйкес әрбір адам оның қылмыстық құқық бұзушылық жасауға кінәсі сот үкімімен анықталғанға дейін кінәсіз деп танылады.