Қызылорда облысында 25 мектеп оқушысы уланып қалды

Зардап шеккендердің барлығы улануды мектеп асханасындағы таңғы аспен байланыстырады. Тексеру басталды.

Санитарлық-эпидемиологиялық бақылау департаменті 21 оқушының ауруханаға жатқызылғанын, қалған балалар амбулаторлық жағдайда дәрігерлердің бақылауында екенін хабарлады.

Оқиға 29 наурыз күні Қызылорда облысы, Қазалы ауданы, Кәукей ауылында болған. Облыстық санитарлық-эпидемиологиялық бақылау департаментінің мәліметінше, зардап шеккендердің барлығы осы аудандағы № 225 орта мектептің 1-5 сынып оқушылары.

«Балалар таңғы асын 09:35-те ішті, бір сағаттан кейін ішінің ауырсынуына алғашқы шағымдармен үш бала мектеп дәрігеріне жүгінді. Одан кейін тағы 22 бастауыш сынып оқушысының ауырғаны белгілі болды. Оның 21-і дереу аудандық көпсалалы аурухананың жұқпалы аурулар бөліміне жатқызылды, қалғандарына амбулаторлық ем тағайындалды. Олардың барлығына тамақтан улану диагнозы қойылды», - деді министрліктің баспасөз қызметі.

Пациенттерді қабылдау кезінде денсаулық жағдайы орташа деп бағаланды, жалпы интоксикация белгілері және асқазан-ішек жолдарының бұзылуы анықталды.

«2023 жылғы 30 наурызда алғашқы медициналық көмек көрсетіліп, емдеу шараларының нәтижесінде жағдайы жақсарған балалар ата-аналардың өтініші бойынша стационардан шығарылды және амбулаториялық негізде медициналық бақылауды жалғастырады. Қазалы аудандық санитарлық-эпидемиологиялық бақылау басқармасымен және «Ұлттық сараптама орталығы» филиалының Қызылорда облысы бойынша аудандық филиалымен бірлесіп жұмыс тобы құрылып, ауру ошағында санитарлық-эпидемиологиялық тексерулер жүргізілуде», - делінген хабарламада.

Ауданға санитарлық тазалық жұмыстарына арнайы Қызылорда облысы бойынша санитарлық-эпидемиологиялық бақылау департаментінің инфекционист дәрігері мен мамандары жеткізілді.

«Санитарлық-эпидемиологиялық зерттеу барысында бактериологиялық зерттеуге 120 сынама, патогенді микрофлораға асхана қызметкерлерінен бір су, жеті тағам сынамасы, мұрын және тамақ жағындылары алынды. Бактериологиялық зерттеуге алынған сынамалардың жаңартылған соңғы нәтижелері бүгін күтілуде. Қазалы ауданының бас мемлекеттік санитарлық дәрігерінің қаулыларымен мектеп асханасының аспазшысы мен аспазшының көмекшісі, сондай-ақ білім мекемесінің медицина қызметкері медициналық тексеруден өтпеуіне байланысты уақытша жұмыстан шеттетілді», - деп қосты департамент.