«Қыз оқымай, бала тууы керек»: Атышулы абайтанушы би болып сайланды

Қазақстанда жаңа би болып – абайтанушы, филология ғылымдарының кандидаты Омар Жәлел сайланды. Ол осыдан бір-екі жыл бұрын әйелдерге қатысты мәлімдеме жасап, атын шығарған.

Оның айтуынша, қыз бала тауар және олар оқу оқымай, бала тууы керек. Бұл сөздер қоғамның үлкен наразылығын тудырды. Араға біраз уақыт салып, атышулы абайтанушының аты тағы да шықты. Ол қазақ халқының биі болып сайланған, деп хабарлайды Еуразия бірінші арнасы.

«Егер ол уақытында үйленбесе, көрінген адаммен кездесе бастайды - ол жауға айналады. Қазір отбасында бәріміз бір жауды тәрбиелеп жатырмыз. Қыз бала - бұл тауар» дейді ол жанжалды мәлімдемесінде.

Жақында осы айтулы сөздердің авторы, абайтанушы Омар Жәлел қазақ биі, яғни халық судьясы болып жарияланды. Алайда бұл оның әйелдерге қатысты алғашқы арандатушылық мәлімдемесі емес. Ол бұрын әйел адамдарды сиясы таусылған, лақтыру керек маркерлерге теңеген. Сол мәлімдемесінде Жәлел әйелдің жалғыз мақсаты - бала туу екенін тағы да айтқан.

Жаңа биді кім, қалай таңдағаны белгісіз. Оның орынбасарының айтуынша, дауыс беру Түркістан облысында өткен. Оған еліміздің 9 облысынан өкілдер жиналған. Нәтижесінде екі жүзге жуық адам Омар Жәлелге өз дауысын берген.

— Жиналғандардың барлығы Шымкентке өз еркімен келді. Және бірауыздан Омар Жәлелге дауыс берді. Негізі оны былтыр таңдау керек еді. Бірақ кейін бұл қызметке 70 жастағы ата өтініш беріп, Омар Жәлел өз орнын берді. Ал биыл халық оны қайтадан таңдады. Ол да келісті,- деп түсіндірді Қазақстан биінің орынбасары Табиғат Әлібекұлы.

Осылайша Омар Жәлел Қазақстанның бас биі болды. Ертеде бұл атақ құрметті адамдарға берілген. Ол ресми түрде еш жерде тіркелмеген, депутаттық мандаты да жоқ. Бірақ ол адамдардың мәселелерін шешуге көмектеседі, сондай-ақ бұл делдалдықтың бір түрі. Омар Жәлелге де осындай міндеттер жүктелген. Рас, ол мұның бәрін ақша үшін емес, «рахмет» үшін жасайды. Оның жалақы алуға құқығы жоқ.

— Бізде баспасөзі де, кеңсесі де бар, бірақ халыққа пайдасы жоқ ұйымдар көп. Бірақ бұл тіпті мәселе емес. Адамдардың жүрегіне жол табу керек. Қазіргі қазаққа әлеуметтік реттеудің дәстүрлі тетіктері керек, бұл жоғарыдан келетін нәрсе емес. Бұл халықтың ішінен шыққан қозғалыс, - дейді ол.

Жаңалықтан хабардар болған Қазақстан халқы оны екіұшты қабылдады.

Омар Жәлелдің мәлімдемелері мен жаңа қоғамдық миссиясы туралы қазақстандық саясаткерлер де пікір білдірді.

— Менің ойымша, бұл дұрыс емес. Бұл әйелдерді қорлау. Оны кім таниды? Бүкіл Қазақстан бойынша кім біледі, мысалы, оны? Менің ойымша, адам атақты, өте танымал болуы керек,- деді Сенат депутаты Нұртөре Жүсіп.

Омар Жәлел 4 айға елдің бас биі болып сайланды. Осы кезеңнің соңында ол атқарылған жұмыс туралы есеп беруі керек. Ал оған дауыс берген халық наразы болып қала берсе, ол отставкаға кетуі керек.