Қытай-Қазақстан-Өзбекстан бағыты дами түспек

Қазақстан Қытай-Қазақстан-Өзбекстан бағытын дамытуға мүдделі, деп хабарлайды ҚР Премьер-Министрінің баспасөз қызметі.

«Біз Қытай-Қазақстан-Өзбекстан бағытын дамытуға мүдделіміз. Бірқатар ірі теміржол жобалары осы бағыттағы өткізу қабілетін арттыруға мүмкіндік береді. Олардың қатарында «Дарбаза-Мақтаарал» желісі, Алматыны айналып өтетін жол және «Достық» стансасын дамыту бар», - деді ҚР Премьер-Министрі Әлихан Смайылов.

Ташкентте Қазақстан мен Өзбекстан үкіметтерінің басшылары Әлихан Смайылов пен Абдулла Ариповтың төрағалығымен екі елдің орталық мемлекеттік органдары басшылары мен іскер топ өкілдерінің қатысуымен Екіжақты ынтымақтастық жөніндегі үкіметаралық комиссияның 20-шы отырысы өтті.

Мәліметтерге сүйенсек, Орталық Азиядағы барлық сауданың 80%-ға жуығы Қазақстан мен Өзбекстанның үлесіне тиеді. Бұл ретте ауыл шаруашылығындағы кооперацияны тереңдетудің, оның ішінде агроөнеркәсіптік кешен мен тамақ өнеркәсібіндегі өзара сауданы кеңейтудің, сондай-ақ Халықаралық өнеркәсіптік ынтымақтастық орталығының «Орталық Азия» кооперациясы құрылысын  одан әрі дамытудың маңызды перспективалары бар.

Премьер-Министрдің баспасөз қызметі Өзбекстанда қазақстандық капиталдың қатысуымен 1200-ге жуық кәсіпорын жұмыс істейтінін атап өтті. Сонымен қатар, осыдан бес жыл бұрын бұл көрсеткіш алты есеге жуық аз болған.

«Экономикалық әріптестікті тереңдетудің басымдығы – өндірістік кооперацияны дамыту. Ташкентте мемлекет басшыларының келіссөздері нәтижесінде біз бірлесе отырып, барлық басым бағыттарды, соның ішінде құны 10 миллиард доллар болатын нақты жобаларды жүзеге асыруды қамтитын Жол картасын қабылдадық», - деді Абдулла Арипов.

Екіжақты құжаттарға қол қою рәсімі өтті, оның ішінде:

• қол жеткізілген келісімдерді біріктіретін Үкіметаралық комиссияның 20-шы отырысының хаттамасы;

• «Орталық Азия» халықаралық өнеркәсіптік ынтымақтастық орталығын құруды жеделдету бойынша жол картасы;

• Жұмыспен қамту және еңбек мигранттарының құқықтарын қорғау саласындағы практикалық іс-қимылдардың бірлескен жоспары.