Қырғызстандық депутат педофилдердің әрекетін оқушы қыздардың қысқа белдемшесімен түсіндірді

Қырғызстан парламентінің депутаты Ақбөкөн Таштанбеков педофилдердің шабуылына оқушы қыздардың өздері кінәлі екенін мәлімдеді.

24kg басылымының хабарлауынша, депутат оқушы қыздар қысқа белдемше киіп, өздері педофилдерді осындай қадамға итеретініне кәміл сенімді.

«Ғаламторда зорлық-зомбылық фактілері бойынша көптеген ақпараттар тарауда. Сондықтан учаскелік полиция қызметкерлері мектепке келіп, мектеп формасын қадағалай алады. Жақында бір оқу орнына бардым. Кейбір оқушы қыздар өте қысқа юбка киген. Менің ойымша, кейде қыздардың өздері арандатады. Қарапайым адам оны байқамай өтіп кетуі мүмкін. Ал педофилдердің мұндай қыздарға бірден көзі түседі» деді депутат.

Мұндай әңгіме парламенттің Құқықтық тәртіп, қылмысқа қарсы күрес және сыбайлас жемқорлыққа қарсы күрес комитетінің отырысында Қадамжай ауданында 14 жастағы қыздың өліміне қатысты атышулы оқиғадан кейін болған.