Қырғызстан президентінің туысы жемқорлыққа қатысы бар деген күдікке ілінді

Қырғызстан президентінің немере інісі кедендегі сыбайлас жемқорлыққа қатысы бар деген күдікке ілініп,  ұсталды.

Ел президенті Садыр Жапаровтың немере інісі ұсталғаны туралы оның баспасөз хатшысы Ербол Сұлтанбаев хабарлады.

«Ұсталған Ұлан Жапаровқа қатысты біз оның шынымен де Мемлекет басшысының туысы екенін хабарлаймыз. Ол кедендегі мәселелерге қатысты сыбайлас жемқорлық ісіне қатысты деген күдікке ілінді. Мұны білген президент Жапаров күдіктілерге  барлық заңды шараларды қолдануды талап етті» деп түсіндірді Сұлтанбаев Facebook әлеуметтік желісінде.

Оның айтуынша, бұл жағдай елдегі сыбайлас жемқорлықпен белсенді күрес жүргізіліп жатқанын және отбасылық немесе басқа да байланыстарға негізделген іріктеушіліктің жоқтығын көрсетеді. Баспасөз хатшысы кінәсі дәлелденсе, немере інісі заң шеңберінде жауап беретінін атап өтті. Сондай-ақ, барлық келтірілген шығынды қалпына келтіруге тиіс.