Қырғызстан президенті Мәскеудегі шеруге қатыспақшы

Садыр Жапаров Жеңіс шеруіне қатысып, Владимир Путинмен келіссөздер жүргізуді жоспарлап отыр.

Қырғызстан президенті Садыр Жапаров 7 мамырда Мәскеуге ресми сапармен барды. Бұл туралы Қырғызстан мемлекеті басшысының баспасөз қызметі хабарлады.

Қырғыз Республикасының Президенті Садыр Жапаров  7 мамырда ресми сапармен Мәскеуге ұшты. Сапар барысында Ресей Федерациясының Президенті Владимир Путинмен екіжақты келіссөздер өтеді деп күтілуде.

Кездесуде екі ел басшылары «екіжақты және көпжақты күн тәртібіндегі өзекті мәселелерді», сондай-ақ екі мемлекет арасындағы өзара тиімді ынтымақтастықты одан әрі дамыту перспективаларын талқылайды. Сондай-ақ, ресми сапар аясында Жапаровтың Ресейдің «басқа да ресми тұлғаларымен» кездесуі жоспарланған.

«Сонымен қатар, 9 мамырда мемлекет басшысы құрметті қонақ ретінде Мәскеудегі Жеңіс шеруіне барады», - делінген хабарламада.

Қырғызстан делегациясының құрамында Сыртқы істер министрі Жээнбек Қулубаев, Қауіпсіздік кеңесінің хатшысы Марат Иманқұлов және ішкі істер министрі Улан Ниязбеков бар екені атап өтілді.

Ал, Жеңіс шеруіне шақырылған Тәжікстан президенті Эмомали Рахмон Путиннің Жеңіс күнін мерекелеуге арналған шараларға қатысуға шақыруына әлі жауап берген жоқ. Шақыру 5 мамырда белгілі болды.

Тәжікстан басшысының баспасөз қызметі 5 мамырда Рахмон Путинмен телефон арқылы сөйлескенін, сөз барысында «президенттер тәжік-ресейлік стратегиялық серіктестік қарым-қатынасы дамуына тоқталып, бір-бірін Жеңістің 78 жылдық мерейтойымен құттықтағанын хабарлады.

Мәскеуде тағы қанша қонақ күтілетіні белгісіз. Бірақ сәуір айында ресейлік «Ведомости» газеті Жапаров әскери шеруде жалғыз шетелдік қонақ болады деген болжам жасаған. Айта кетейік, 2022 жылы Мәскеудегі Жеңіс шеруіне ешкім шақырылмаған. Одан кейін Путиннің баспасөз хатшысы Дмитрий Песков шараның мерейтойсыз өтуіне байланысты Кремль шеруге ешкімді шақырмағанын хабарлады.