Қырғызстан астанасында халық митингке шықты

Қырғызстан астанасы Бішкектегі Ақ үй ғимаратының жанында митинг болып жатыр. 

Жиналған халық қырғыз-тәжік шекарасындағы қазіргі жағдайға алаңдаушылық білдірген. Наразылық білдірушілер алдына Жоғарғы Кеңес депутаты Сұлтанбай Айжігітов шықты.

Оның айтуынша, қақтығыс бойынша Парламент отырысы өтіп жатыр. Шеруге шығушылардың талап-арызы ескерілген. Депутаттар бейбіт тұрғындарды эвакуациялау жұмыстары жүріп жатқанын, гуманитарлық көмектер жиналғанын мәлімдеді.

Митингке 100-ге жуық адам шыққан. Олар биліктен шекарадағы жанжалды тез арада шешуді талап етті.

Еске салсақ, 14 қыркүйекте қырғыз-тәжік шекарасында қарулы қақтығыс басталды. Бұлақ-Башы, Қақ-Сай, Пасқы-Арық аудандарында атыс шықты. Кейін шекара қызметі бес жерде атыс болғанын хабарлады.