Қырғыз-тәжік шекарасында 200 шақырым даулы аумақ бар

Қырғызстан жақын арада Тәжікстанмен шекарадағы даулы жерлер мәселесін шешуді көздеп отыр.

Бұл туралы Қырғыз Республикасы Министрлер кабинетінің төрағасы Ақылбек Жапаров мәлімдеді.

— Біз қырғыз-тәжік мемлекеттік шекарасындағы 200 шақырым даулы аумақтарды шешу үшін бар күш-жігерімізді, әлеуетімізді саламыз. Қандай жолмен жүрсе де, біз халықтың бейбіт өмірін қамтамасыз ету үшін шекараларды делимитациялау және демаркациялау мәселесін шешетін боламыз, - деді Жапаров.

Оның айтуынша, қазір мемлекеттің басты міндеті - қырғыз-тәжік шекарасындағы қақтығыс кезінде бүлінген үйлерді қалпына келтіру. Әсіресе, Баткен және Лейлек өңірлеріндегі үйлерді күн суытпай қалпына келтіру жоспарлануда.

— Арнайы есепшотқа азаматтардан 307 млн ​​сом түсті. Тиынына дейін осы қаржы ресурстарының барлығы Баткен облысының тұрғындарына бағытталады. Бұл мәселе менің ерекше бақылауымда, - деді Жапаров.

Қыркүйектің 16-сы күні Қырғызстан мен Тәжікстан шекара әскерлері арасында ауқымды қақтығыс болып, салдарынан екі жақтан 100-ге жуық адам қаза тапты.