Құран өртеу оқиғасынан кейін Швецияның НАТО-ға кіруіне жол жабылды

Швеция Сыртқы істер министрі Биллстрем әлі де жазда Түркиямен мәселе шешіліп, елдің НАТО-ға мүше болуына рұқсат етіледі деп үміттенеді.

Швецияда елдің НАТО-ға кіру процесі үзілді. Бұл даниялық саясаткер Расмус Палуданның ұйымдастырып отырған Құранды өртеу әрекеттеріне байланысты. Елдің Сыртқы істер министрлігінің басшысы Тобиас Билстрем Expressen газетіне берген сұхбатында бұл процестің әзірге тоқтатылғанын, бірақ әлі де үміт бар екенін айтты.

— Соңғы бірнеше аптадағы оқиғалар әсерінен  процес уақытша тоқтатылды, - деді ол.

Министр жазда альянс елдерінің сыртқы істер министрлері Вильнюстегі саммитке жиналған кезде Түркиямен келісімге келуге болады деп үміттенеді.

Айта кетейік, даниялық радикал саясаткер Расмус Палудан бұған дейін Құранды өртеп,  бірнеше акция жасаған. Соңғы рет жұма күні ол Копенгагендегі мешіттің сыртында Құранды өртеп жіберген.

Кейін оның осындай акцияны Даниядағы Ресей елшілігінің консулдық бөлімінде өткізгені белгілі болды. Бұған дейін 21 қаңтарда «Hard Deal» жетекшісі Швеция билігінен рұқсат алып, Стокгольмдегі Түркия елшілігінде мұсылмандардың қасиетті кітабын өртеп жіберген.

Түркия президенті Режеп Тайып Ердоған осыдан кейін Швецияның НАТО-ға кіру өтінішін Анкара қолдамайтынын айтты.