Құны 100 миллион теңге тұратын мефедрон тәркіленді

Қостанай облысында құны 100 миллион теңге тұратын мефедрон жасырған  31 жастағы облыс тұрғыны ұсталды.

Тобыл қаласында «Қарасора-2023» операциясы аясында есірткі саудасымен айналысты деген күдіктіні ұстау шарасы өтті, деп хабарлайды Orda.kz.

Тінту кезінде 3 келіден астам синтетикалық есірткі тәркіленді.

«Тінту кезінде 2 мыңнан астам оралған «синтетика» тәркіленді, бұл өте қомақты көлем», - деп түсіндірді Қостанай облысы ІІД есірткі қылмысына қарсы күрес басқармасының бастығы Нұржан Ахметов.

Аталған факті бойынша ҚР Қылмыстық кодексінің 297-бабының 3-бөлігі бойынша сотқа дейінгі тергеу басталды. Күдікті қамауға алынды. Сараптама тәркіленген заттың мефедрон екенін көрсетті.

Қостанай облысында «Қарасора-2023»  қылмыстық іздестіре операциясы басталғалы бері 10 келіден астам түрлі есірткі заттары тәркіленді.