Қостанайдағы Қазақстан-Ресей форумына бөлінген 11 миллиард теңге қайда?

Қостанай облысының әкімі Құмар Ақсақалов Орталық коммуникациялар қызметінде өткен брифингте күзде облыс орталығында өтетін Қазақстан-Ресей форумы қарсаңында бөлінген қаржының қайда бағытталатынын айтты, деп хабарлайды Orda.kz.тілшісі.

Орталық коммуникациялар қызметінде өткен брифингте журналистер облыс әкіміне «Қаланың инфрақұрылымын дамытуға 11 миллиард теңге бөлінді. Неліктен мұндай жұмыс дәл Путиннің келуіне жоспарланған?» деген сұрақ қойды.

«Менің ойымша, бұл сұрақ сәл дұрыс қойылмай тұр. Қаражат форумды өткізуге емес, қаланың инфрақұрылымын жақсартуға бағытталды. Форум болмаса да бұл қаржы бөлінетін еді. Қаражаттың басым бөлігі жолдарды жақсартуға жұмсалады. Биыл оның 65-і жөндеуден өтеді. Жылу желілері мен су желілерін жөндеуге қаржы бөлініп, балаларға арналған смарт орталық та салынуда. Мұның бәрінің форумға ешқандай қатысы жоқ. Өкінішке қарай, бұл қате пікір», – деді Құмар Ақсақалов.

Форумның өзіне келетін болсақ, әкімнің айтуынша, оған бар болғаны 1,5 миллион теңге қажет, өйткені қонақүйде тұру, тамақтану және көлік шығындарын қатысушылар өздері төлейді.