Қостанай облысындағы көлден жарты тонна өлі тұқы балығы табылды

Балықтардың қырылуына орташа тереңдігі бір метрден аспайтын су қоймасының қатып қалуы себеп болып отыр.

Қостанай облысындағы Силантьевка ауылының маңындағы атаусыз көлде тұқы қырылып қалды. Дереу су қоймасына барған Тобыл-Торғай облысаралық бассейндік балық шаруашылығы инспекциясының қызметкерлері оның себептерін анықтап жатыр, деп хабарлайды Orda.kz тілшісі.

«Бір түрдегі балық қырылып қалды -  олард 5-тен 10 сантиметрге дейін, орташа салмағы 15-тен 100 граммға дейін. Ластаушы заттардың бар-жоғына зертханалық зерттеулер жүргізу үшін су сынамалары алынды», - деп түсіндірді инспекциядағылар.

Мамандар ауылдық округ әкімдігі және табиғи ресурстар бөлімімен бірлесе отырып өлген балықтарды жинап, кәдеге жаратуды ұйымдастырды. Оның жалпы салмағы 427 келі болды.

Болжам бойынша себебі - су қоймасының түбіне дейін қатып қалуы, судың орташа тереңдігі бір метрден аспайды. Көлдің өзі Алтынсарин ауданы, Силантьевка ауылының маңында орналасқан, оның аумағы 50 гектарға жетеді.