Қошанов нашар дайындалған министрлерге шүйлікті

Мәжіліс спикері Ерлан Қошанов премьер-министр Әлихан Смайыловқа қарамағындағы министрлердің дайындықсыздығы туралы хабарлауды сұрады.

Парламент мәжілісінің төрағасы Ерлан Қошанов жалпы отырысқа дайындықсыз келген министрлік өкілдерін сынға алды. Ол премьер-министрден қарамағындағылардың дайындығы нашар екенін білуді талап етті.

– Мен кейбір министрлік өкілдеріне ескерту айтайын деп едім. Дайындалып келу керек. Мына отырыста қолдарыңызға жазып берген қол астындағы адамдардың анықтамасын оқудың еш қажеті жоқ. Осылардың барлығы жұмыс тобында, комитет отырысында талқыланды. Оны бес саусақтай біліп тұруларыңыз керек-қой? Мен үкімет өкіліне де осы ескертпені айтамын. Премьер-министрге жеткізіңіз! Егер министрлік өкілі дайын емес болса, онда басқа адамдар келсін. Келістік пе?, – деп ашуланды Ерлан Қошанов.

Депутаттар алдында Ұлттық экономика министрі Әлібек Қуантыров сөз сөйлеп, мемлекет басшысының кейбір тапсырмаларын орындау мәселелері бойынша заңнамаға енгізілген өзгерістермен таныстырды. Талқылау барысында депутаттардың сауалдарына сауда және интеграция вице-министрі Жанел Күшікова, энергетика вице-министрі Әсет Мағауов, бәсекелестікті қорғау және дамыту агенттігі төрағасының орынбасары Болат Сәмбетов жауап берді.

Депутаттар заң жобасын бірінші оқылымда мақұлдады.