Қорғаныс министрлігі есірткі плантацияларын іздеуде дрондар қолданады

Ұшқышсыз ұшақтардың көмегімен 600 келіден астам марихуана тәркіленді, он қылмыскер ұсталды, деп хабарлады ішкі істер министрлігінің баспасөз хатшысы Шұғыла Тұрлыбек брифингте.

— Қазақстанның оңтүстік облыстарында құрамында есірткі бар өсімдіктердің вегетациялық кезеңінде жүргізілетін «Қарасора-2022» есірткіге қарсы республикалық арнайы операциясы аяқталуда. 2022 жылы арнайы операцияда алғаш рет әуе барлауын жүзеге асыратын Қорғаныс министрлігінің ұшқышсыз ұшатын аппараттары қолданылды. Олардың көмегімен аса ірі көлемде есірткі сақтаудың алты фактісі анықталып, 600 келіден астам марихуана тәркіленіп, он қылмыскер ұсталды, - деді Тұрлыбек.

Оның айтуынша, төрт айдың ішінде полиция қызметкерлері 1075 есірткі қылмысын анықтады, оның ішінде 547 сату, 137 сақтау және 244 есірткі бар өсімдіктерді өсіру фактілері.

Операция барысында 9,2 тонна зат, оның ішінде екі тонна марихуана, 169 келі гашиш, 37 келі синтетикалық есірткі, 720 грамм героин және 58 мың түптен астам мәдени өсімдіктер тәркіленді. Жабайы өсетін 85 тоннадан астам қарасора жойылды.