Қорғаныс министрлігі әскердегі суицидке қатысты түсініктеме берді

Қорғаныс министрлігі қарулы күштер қатарындағы суицидке қатысты жағдайға түсініктеме берді. Бір күн бұрын тағы бір әскери қызметші өзіне қол жұмсады. Жамбыл облысындағы Шөлдала шекара заставасынан 18 жастағы мерзімді қызметтегі сарбаз Бекбол Мираштың денесі табылды.

– Соңғы кездері еліміздің күштік құрылымдарында орын алған өз-өзіне қол жұмсау фактілерінің жиілеуі түсіндіруді қажет етеді. Әскери қызметшінің өлімі тек Қарулы күштерде ғана емес, басқа да әскерилер арасында орын алып отыр. Бағыныстылардың өмірі мен денсаулығына ҰҚК Шекара қызметі, ІІМ Ұлттық ұланы, Мемлекеттік күзет қызметі және Төтенше жағдайлар министрлігі де жауапты. Бейбіт уақытта аталған күштік құрылымдар Қарулы күштердің құрамына кірмейді және Қорғаныс министрлігі олардың қауіпсіздігін бақыламайды, – делінген хабарламада.

Қорғаныс министрлігінің жазбасына сәйкес, сарбаздардың өзіне қол жұмсауына әскерге дейінгі өмірдегі осындай әрекетке итермелейтін әр түрлі жағдайлар болуы мүмкін.

– Өзі-өзіне қол жұмсау сияқты шарасыз қадамға бару ол адамның туыстары мен жақындары үшін орны толмас қайғы. Командирлерге де жауынгерден айрылу ауыр шығын. Қарулы күштер құрамында болған әрбір жағдайды әскери полиция қызметкерлері және басқа да қылмыстық қудалау органдары мұқият тексереді. Тексеру нәтижелері өз-өзіне қол жұмсау көп жағдайда әскери қызметке қатысты емес екенін көрсетті. Әскерге шақырғанға дейінгі кезеңде әскери қызметшілерді осындай әрекетке итермелейтін әр түрлі өмірлік жағдайлар болатынын ескеру керек. Қазіргі уақытта Қорғаныс министрлігінің бастамасымен ғылым, құқық қорғау органдары мен үкіметтік емес ұйым өкілдерінің қатысуымен әскери ортада орны толмас шығындарды барынша азайтуға және суицидтің алдын алуға бағытталған «Өмірді сақта» кешенді бағдарламасы әзірленіп жатыр, – деп хабарлады министрлік.