Qnet компаниясының Қазақстандағы басшылығына қатысты тергеу амалдары жүргізілуде

Компанияның Қазақстанда жұмыс істеуге лицензиясы жоқ. Іс бойынша айыпталушылардың бірі үйқамақта.

Қазақстандағы халықаралық Qnet компаниясы тағы да қаржылық пирамида деп аталды.

Құрылымдық бөлімшенің басшылығына қатысты тергеу амалдары жүргізілуде, деп хабарлады ҚР Қаржы мониторингі агенттігі.

«Ақмола облысы бойынша Қаржы мониторинг агенттігі аумақтық департаменті «Qnet» компаниясының халықаралық қаржы пирамидасының құрылымдық бөлімшесінің басшыларына қатысты сотқа дейінгі тергеп-тексеруді бастады» деді ведомствоның баспасөз хатшысы Әлібек Әбділов.

Оның айтуынша, компанияның Қазақстан аумағында тіркеуі жоқ, кәсіпкерлік қызметпен айналыспайды, банктік қызмет пен банктік операцияларды жүргізуге лицензиялар, рұқсаттар жоқ.
Сонымен қатар, іс бойынша сотталушылардың біріне қатысты үйқамақ түріндегі бұлтартпау шарасы санкцияланды.

1998 жылы құрылған Qnet QI тобының негізгі еншілес ұйымы. Гонконгта орналасқан, тікелей сату және көп деңгейлі маркетинг арқылы компания қаржылық пирамидаларды құрды деп бірнеше рет айыпталған.