ҚМГ бұрынғы басшысы Алик Айдарбаевтың қайда екені анықталды

«ҚазМұнайГаздың» экс-төрағасы Алик Айдарбаев Ұлыбританияда жүр.

Алик Айдарбаев 3 ақпанда Ұлыбританиядағы Әзірбайжан елшілігі ұйымдастырған шараға қатысты. Ол Ұлыбритания парламентінің төменгі палатасында «AZERBAZALT» ғылыми-өндірістік бірлестігі мен AZCHEMCO компаниясының тұсаукесеріне арналды.

Іс-шарада Әзірбайжандағы компаниялардың инновациялық жобалары, сондай-ақ жобаны дамыту географиясын Батысқа қарай кеңейту жоспарлары ұсынылды. Тұсаукесер рәсіміне «ҚазМұнайГаздың» экс-төрағасы Алик Айдарбаев та қатысты.

Алик Айдарбаев «ҚазМұнайГаз» басшысы қызметінен кету туралы өтінішін 2022 жылдың сәуірінде берген. Оның жұмыстан кетуіне денсаулық жағдайы себеп болған.

Ол «ҚазМұнайГазды» 2018 жылдың қарашасынан бері басқарып келді. Бұған дейін «Самұрық-Энерго» АҚ директорлар кеңесінің төрағасы, «Самұрық-Қазына» ұлттық әл-ауқат қоры» АҚ басқарма төрағасының орынбасары, Инвестициялар және даму бірінші вице-министрі, Маңғыстау облысының әкімі қызметтерін атқарған.