«ҚазМұнайГаздың» еншілес кәсіпорны авиакеросинді жоғары бағамен сатқан

Қазақстан Республикасы Бәсекелестікті қорғау және дамыту агенттігінің Нұр-Сұлтан қаласы бойынша департаменті «ҚазМұнайГаз-Аэро» ЖШС жанар-жағармайды тең емес шарттармен сату арқылы заң бұзды деген қорытындыға келді.

Ведомствоның хабарлауынша, азаматтардың өтініші негізінде 2020-2021 жылдарға арналған Нұр-Сұлтан қаласы бойынша авиаЖЖМ көтерме сауда нарығындағы бәсекелестік жағдайына талдау жасалған.

Тексеру барысында компания 2021 жылы авиакеросиннің 57 пайызын «Нұрсұлтан Назарбаев халықаралық әуежайы» АҚ-на жоғары бағамен сатқаны белгілі болды.

Тиісті тауар нарығында басым жағдайға ие «ҚазМұнайГаз» АҚ еншілес ұйымының әрекеті Қазақстан Республикасы Кәсіпкерлік кодексінің талабын бұзды. «ҚазМұнайГаз-Аэро» ЖШС-нің әрекеті авиакомпаниялар шығындарының өсуіне әсер етіп, соның салдарынан әуе билеттерінің қымбаттауына алып келеді.

Нұр-Сұлтан қаласы бойынша департаменті бәсекелестік заңнамасын бұзу фактісі бойынша «ҚазМұнайГаз-Аэро» ЖШС-не нарық субъектілерімен балама келісімдерге әртүрлі бағаларды қолдану бойынша іс-әрекеттерді тоқтатуды талап етіп, хабарлама таратты.

«ҚазМұнайГаз-Аэро» ЖШС департаменттің заңды талаптарын орындады және қазіргі уақытта авиакеросинді контрагенттерге сату кезінде Серіктестік баға белгілеуге бірыңғай сараланған тәсілді қолданады.