Қазфосфатта қаза тапқан екі жұмысшының өлімі бойынша сот үкімі шықты

Бүгін Сарысу аудандық соты үкімімен Ғалымжан Құдайберген мен Самат Бекмаханбетов ҚР Қылмыстық кодексінің 156-бабының 4-бөлігі бойынша кінәлі деп танылды.

Заңда көзделгендей еңбектi қорғау, қауіпсіздік техникасы, өнеркәсіптік санитария қағидаларын немесе еңбекті қорғаудың өзге де қағидалары бұзылған. Осы қағидаларды сақтауды ұйымдастыру немесе қамтамасыз ету жөніндегі міндеттер жүктелген адам тиісті міндетін дұрыс атқармаған. Абайсызда денсаулыққа ауырлығы орташа зиян келтіру мен абайсызда екі немесе одан да көп адамның өліміне әкеп соққан іс-әрекет бойынша олар кінәлі деп танылды.

Прокурор айыпталушының әрқайсысына 3 жыл 6 алты ай бас бостандығынан айыру жазасын сұраған еді. Сот Құдайбергенді 3 жыл 6 алты ай шартты түрде, Бекмаханбетовты 3 жылға шартты түрде бас бостағындығынан айырды. Сатқанбаев кінәсіз деп танылып, оған ақтау үкімі шығарылды.

«Қазфосфат» ЖШС-нен азаматтық талапкерлерге 5 000 000 теңге шығын өндіріп алу туралы үкім шықты.

Құдайберген «Қазфосфат» ЖШС Тау кен байыту комбинатында электр слесары болып жұмыс істеген, ал Бекмаханбетов пен Сатқанбаев механик қызметін атқарған.

Сот үкімі заңды күшіне енген жоқ.

Авторы: Исламбек Дастан