«ҚазАвтоЖол» және «Казахавтодор» бірыңғай жол компаниясына біріктірілді

«ҚазАвтоЖол» мен «Казахавтодор» бірігіп, біртұтас автожол компаниясын құрды. Биыл шілде айында Қасым-Жомарт Тоқаев Үкіметтің кеңейтілген отырысында осындай тапсырма берген еді. Бұл туралы Индустрия және инфрақұрылымдық даму министрлігінің баспасөз қызметі хабарлады.

– Қазір еліміздегі жолдың жай-күйін қадағалап, қызмет көрсететін екі негізгі оператор бар. Турасын айтсақ, екеуі де бір жұмыс атқарып отыр, жұмысшыларының саны да қажетті шамадан артық. Соған қарамастан, азаматтардан келіп жатқан орынды арыз-шағымдар азаяр емес, ал жолдың сапасы мүлде сын көтермейді, – деді Тоқаев Үкіметтің кеңейтілген отырысында.

Осылайша, «ҚазАвтоЖол» және «Казахавтодор» бірыңғай жол компаниясына біріктірілді.

– Президент тапсырмасын жүзеге асыру мақсатында Индустрия және инфрақұрылымдық даму министрлігі аталған екі жол операторын біріктіру бойынша Үкімет қаулысының жобасын дайындады. Жобада «ҚазАвтоЖол» Ұлттық компаниясы «Казахавтодор» ЖШС-дағы мемлекеттік үлесті сатып алу жолымен ұлттық компанияны Бірыңғай автожол операторы ретінде қайта құру қарастырылды. Атап айтқанда, аталған компаниялардың облыстық филиалдарының әкімшілік-басқару персоналын қысқарту жолымен біріктіру және қайталанатын функцияларды қысқарту, – деп жазылған хабарламада.