«Қазақтелеком» басқа операторлардың  кабельдік арналарға қолжетімділігін шектеді

«Қазақтелеком» АҚ  басқа операторлардың  кабельдік арналарға қолжетімділігін шектеді, деп хабарлайды «Атамекен» Ұлттық кәсіпкерлер палатасының баспасөз қызметі.

«Қазақтелеком» АҚ еліміздің жерасты кабельдік арнасының 80%-дан астамының иесі, оған қол жеткізу басқа операторлар үшін шектелген, бұл операторлардың түпкі пайдаланушыларға өз қызметтерін көрсетуін айтарлықтай қиындатады және соңғысының байланыс қызметін жеткізуші таңдауда шектейді. Мысалы, 2020 жылы «КаР-Тел» ЖШС-нің кабельдік каналдарға қолжетімділік туралы жолдаған 92 өтінішінің 27% қанағаттандырудан бас тартылса, Алматы қаласы бойынша 90% жағдайда бас тартылған. «Алма ТВ Қазақстан» АҚ өтініштердің 40%-ын қараусыз қалдырды» делінген ақпаратта.

Енді монополист басқа операторларға жалға беру үшін бос орынның 25 пайызын қалдыруға міндетті болады.

— Бұл бастаманы нарық ұсынып, мемлекеттік орган қолдады. Жақын арада оларды ережеге енгізу жоспарлануда. АКТ және ақпараттық қауіпсіздік саласындағы бірыңғай талаптарды қарастыру шеңберінде, орындамағаны үшін жауапкершілік қарастырылған субъективті сипаттағы талаптар анықталды, мысалы, сенімділік, техникалық қызмет көрсету, бағдарламалық қамтамасыз етуді пайдаланудың қарапайымдылығы – ол, министрліктің қолдауымен алынып тасталады, - деді «Атамекен» ҚР ҰКП Адами капиталды дамыту департаментінің басқарушы директоры Азамат Бейсенбенов.

Мәліметтерге сәйкес, 800-ден астам бизнес талаптары анықталған. Нәтижесінде 33%-ы жеті негізгі қағидаға сәйкес келмейді, негізгі шарттарға сәйкес келмейтін және күшін жоюды талап ететін талаптар саны – 207, түзетулер – 66.