Қазақстанның Ресейдегі елшілігі азаматтарды сақ болуға шақырды

Әскери-саяси жағдайдың шиеленісуіне байланысты Қазақстанның Ресейдегі Елшілігі ресми мәлімдеме жасады.

Қазақстанның Ресейдегі Елшілігі отандастарды консулдық есепке тұрып, абай болуды сұрайды, деп хабарлайды Orda.kz.

«Ресейдің Украинамен шектесетін аймақтарына қауіп төніп тұрғанына байланысты, сізден ол жаққа бармауыңызды сұраймыз. Біз Ресей Федерациясында, әсіресе Украинамен шекаралас аймақтарда жүрген барлық азаматтарымызды Қазақстанның Ресейдегі Елшілігінің консулдық мекемесіне шұғыл түрде тіркелуді сұраймыз» делінген хабарламада.

Елшілік форс-мажорлық жағдайда Қазақстан азаматтарына барлық қажетті көмек пен қолдау көрсетілетінін айтты.

Еске салайық, Вагнер тобының негізін қалаушы Евгений Пригожин 24 маусымға қараған түні Ресей Қорғаныс министрлігін жалдамалылардың позицияларына соққы берді деп айыптаған бірнеше аудио хабарлама жариялаған. Ол «біз 25 мыңбыз, елде неліктен хаос болып жатқанын анықтаймыз» деді. Пригожиннің айтуынша, оның тобы «елдің әскери басшылығы көтеріп отырған зұлымдықты тоқтатуды» жоспарлап отыр.

Ресей Федерациясының Ұлттық терроризмге қарсы комитеті бұл мәлімдемелерге байланысты қарулы көтеріліске шақыру фактісі бойынша қылмыстық іс қозғалғанын хабарлады. Путинге жағдай баяндалған.

Мәскеу мэрі Сергей Собянин Мәскеуде «қауіпсіздік шараларын күшейту үшін лаңкестікке қарсы шаралар жүргізіліп жатқанын» айтты. Ресей Федерациясы астанасында жолдарға қосымша бақылау енгізілді. Қоғамдық шараларды өткізуге шектеу қойылған.

Қазіргі уақытта Пригожин Ростовтағы әскери аэродром мен РФ Қарулы күштерінің Ростов тобының штаб-пәтерін бақылауда ұстап отырғанын мәлімдеді.