Қазақстаннан Пәкістанға жолаушылар рейсі ашылады

Тұрақты әуе рейстерінің ашылғаны Қасым-Жомарт Тоқаев пен Пәкістан премьер-министрі Шахбаз Шарифтің телефон арқылы сөйлесуінен кейін белгілі болды.

ҚР ИИДМ  Азаматтық авиация комитеті Пәкістанның авиациялық билік органдарымен бірлесіп және Қазақстан Республикасының Пәкістандағы Елшісі Е.С.Кистафиннің көмегімен тұрақты жолаушылар рейсін ашу мәселесі қолға алынғанын мәлімдеді.

«2023 жылдың 8 шілдесінен бастап SCAT әуе компаниясы Boeing 737 ұшағымен аптасына 2 рейс (сәрсенбі және сенбі) жиілігімен Алматы-Лахор бағыты бойынша тікелей тұрақты жолаушылар рейсін орындауды жоспарлап отыр» делінген хабламада.

Қазақстан мен Пәкістан арасындағы әуе қатынасының ашылуы елдер арасындағы сауда-экономикалық, инвестициялық, туристік және мәдени ынтымақтастықтың дамуын жеделдететіні атап өтілді.

Бұл ретте Қазақстан мен Пәкістан түрлі салалардағы ынтымақтастықты кеңейтуді жоспарлап отыр.

Бүгін Пәкістан тарапының бастамасымен Қасым-Жомарт Тоқаев Пәкістан Премьер-Министрі Шахбаз Шарифпен телефон арқылы сөйлесті. Сауда-экономикалық саласындағы Қазақстан-Пәкістан ынтымақтастығының келешегі талқыланды.

Ақорданың хабарлауынша, тараптар сондай-ақ өзара сауда өсімінің оң динамикасын және Қазақстан мен Пәкістан арасындағы әртүрлі салалардағы ынтымақтастықтың кеңеюін атап өтті. Әңгімелесу барысында көшбасшылар елдер арасындағы екіжақты қарым-қатынастарды одан әрі нығайтуға мүдделі екендіктерін қуаттады.

Әңгіме соңында Премьер-Министр Шахбаз Шариф Президент Қасым-Жомарт Тоқаевты өзіне ыңғайлы кез келген уақытта Пәкістанға ресми сапармен келуге шақырды.