Қазақстандықтар Ресейдің әскери комиссариатын өртеді деген күдікке ілінді

Омбыда полицейлер 13 мамырда болған әскери комиссариат ғимаратының өртену фактісін тексеріп жатыр. Бұл ретте тергеу  іске қазақстандықтар уәде етілген 800 мың рубль ақшалай сыйақы үшін қатысты деп күдіктеніп отыр.

«Московский комсомолец» газеті Telegram арнасына сілтеме жасап, тергеуде күдіктілер - Аңсаған Молдахметов пен Сейіл Диас Мұратұлы бар деп жазады. Мұндай әрекеттерді сыйақы үшін орындауды оларға Telegram арнасында белгілі бір «Добрынья Никитич» ұсынған деген болжам бар.

«Белгіленген күні күдіктілер автокөлікпен әскери комиссариат ғимаратына жетіп, ішіне бес «Молотов коктейлін» лақтырған. Ғимараттың өртеніп жатқанын көрген олар оқиға орнынан кетіп қалған» деп жазады басылым.

Өрт тез сөндіріліп, 24 тамызда күдіктілердің бірі ұсталғаны атап өтілді. Екіншісі әлі бостандықта. Ұсталған азаматқа қатысты алдын ала сөз байласу арқылы бір топ адам жасаған лаңкестік әрекет бабы бойынша қылмыстық іс қозғалды. Мұндай ауыр бап бойынша ол 20 жылға дейін бас бостандығынан айрылуы мүмкін.