Қазақстандықтар банкроттық туралы 34 мың өтініш берді

3 наурызда Қазақстанда жеке тұлғалардың банкроттығы туралы заң күшіне енді.

Осы уақыт ішінде 34 мың адам банкроттық туралы арызданған. Өтініштердің басым бөлігі Түркістан облысында – 5400, одан кейін Алматы облысы – төрт мыңға жуық өтініш. Үшінші орында 2900 өтінішпен Алматы қаласы тұр.

— Бүгінгі таңда 10 382 өтінішті тексеру аяқталды (бұл барлық түскен өтініштердің 30%-ы), нәтижесінде 2670 азаматқа қатысты соттан тыс банкроттық рәсімі қозғалды, бұл барлық өтініш бергендердің 26%-ын құрайды. Оның 375-і мемлекеттік атаулы әлеуметтік көмек алушы, 985-і бес жылдан астам көмекақы төленбеген азаматтар, - деді ҚР Қаржы вице-министрі Ержан Біржанов Орталық коммуникациялар қызметінде өткен брифингте.

7340 өтініш бойынша азаматтар қабылдамау туралы хабарлама алды.

Бас тартудың негізгі себептері:

1. Несиелік бюролардың мәліметі бойынша 6 713 адам 12 ай ішінде қарызын ішінара өтеген немесе қарыз сомасы 1 600 АЕК шегінен асып кеткен;

2. 6 айдың ішінде 1846 адам АӘК алушы екенін ЖӘСҚА растамады;

3. 1463 адам жұбайының болуы фактісін көрсетпеген және сәйкесінше рәсімді қолдануға келісімін алмаған;

4. Әділет министрлігінің мәліметі бойынша, 1349 адамның жылжымайтын мүлкі бар;

5. Ауыл шаруашылығы министрлігінің мәліметі бойынша 941 азаматтың жер телімі бар;

6. 789 азаматқа автокөлік құралдары тіркелген (Ішкі істер министрлігінің мәліметтері).

«Қазақстан Республикасы азаматтарының төлем қабілеттілігін және банкроттығын қалпына келтіру туралы» Заңның талаптарына сәйкес мемлекеттік кірістер органдары 15 жұмыс күні ішінде азаматтың келесі шарттарға сәйкестігін тексереді:

• банктерге, микроқаржы ұйымдарына (МҚҰ) және коллекторлық агенттіктерге берешек 5,5 миллион теңгеден (1600 АЕК) аспауы керек;

• қарыздарды төлеу мерзімі 12 айдан аспауы керек;

• мүліктің, оның ішінде неке кезінде бірлесіп алған мүлкінің (автокөлік, пәтер, үй, жер учаскесі, банктегі депозит және т.б.) болмауы;

• банктермен және МҚҰ-мен қарыздар бойынша есеп айырысу рәсімі жүргізілді.

Мемлекеттік атаулы әлеуметтік көмек алушыларға, сондай-ақ қарызы 5 жылдан астам өтелмеген азаматтарға бөлек тексеру жүргізіледі.