Қазақстандықтар балаларға арналған хиджамаға қарсы петицияны жаппай қолдауда

Атырауда сәбилерге арналған хиджама (қан алу) процедурасы түсірілген видео  кеңінен таралғаннан кейін қазақстандықтар балаларға мұндай ем-дом жасауға тыйым салу туралы жаппай петицияны бастап, қол қоюда.

Хиджама - бұл қан алу, теріні кесу немесе тілу арқылы қан шығарылады. Бұл әдіс ортағасырлық медицинада танымал болды, бірақ қазіргі заманғы дәлелді медицинада бұндай тәсілмен қан  шығару көрсеткіштері өте шектеулі.

Денсаулық сақтау министрлігі хиджама лицензияланған медициналық көмекке жатпайтынын растады. Соған қарамастан, хиджамамен айналысатын дәрігерлер қызмет көрсетуді және оларды, соның ішінде балаларға да ұсынуды тоқтатар емес.

Қазақстандық бір топ медицина саласының мамандары мен ғалымдары Денсаулық сақтау министрлігін балама медицина тәжірибесі мен хиджаманы қолданумен байланысты әрекеттерді, әсіресе кәмелетке толмағандарға қатысты осы тәжірибені қолдануды реттеуге араласып, шара қолдануға шақырған петиция бастады.

Екі күн ішінде оған 11 мыңнан астам азамат қол қойды. Қол жинау жалғасуда.