Осы мақсатта Қазақстан Республикасының шетелдегі консулдықтары мен елшіліктерінде 68 сайлау учаскесі ашылады.
Шетелде тұратын немесе сондағы қазақстандықтар Қазақстан Республикасының консулдықтарының немесе елшіліктерінің аумағында дауыс беруге қатыса алады. 53 елдің шетелдік өкілдіктерінде 68 сайлау учаскесі ашылады. Бұл туралы еліміздің Сыртқы істер министрлігі хабарлады.
«Белсенді сайлау құқығы бар, тиісті шет мемлекетте жеке, ресми, білім беру, іскерлік және туристік мақсатта тұратын немесе болатын және жарамды төлқұжаты бар Қазақстан азаматтары дауыс беру үшін Қазақстанның дипломатиялық немесе консулдық өкілдігіне жүгіне алады. Консулдықтар жанынан сайлау учаскесі құрылды», деп түсіндіреді ведомство.
Заңға сәйкес, шетелдік мекемелерде дауыс беру сайлау күні, яғни жексенбі, 20 қарашада жергілікті уақыт бойынша сағат 07:00-ден 20:00-ге дейін өтеді.
Бұл ретте Сыртқы істер министрлігі осы уақытта шетелде жүрген немесе болатын қазақстандықтарды жақын жердегі сайлау учаскесіне алдын ала хабарласып, сайлаушылар тізіміне енгізу үшін мәліметтер беруін сұрайды.
